pahlī pahlī vo mulāqāt vo barsāt kī raat
yaad hai yaad hai vo sharm-o-hijābāt kī raat

vo lagāvaT se hama shikve-shikāyāt kī raat
vo tire sāya-e-gesū meñ hikāyāt kī raat

Dol par chāñd hare khet fazā.eñ ḳhāmosh
kaisī ma.asūm havā kartī hai dehāt kī raat

hashr kā roz kabhī ḳhatm to hogā zāhid
aa.egī aa.egī zālim ye ḳharābāt kī raat

ek jannat ke liye itnā alam shaiḳh-e-haram
kaash hotī tirī qismat meñ ḳharābāt kī raat

inqalāb aisā bhī mumkin hai palaT de taqdīr
dūsrī baar mirī pahlī mulāqāt kī raat

ruuh pāband-e-anāsir hai bas itnī 'tālib'
jaise mehmān musāfir ho koī raat kī raat

pahli pahli wo mulaqat wo barsat ki raat
yaad hai yaad hai wo sharm-o-hijabaat ki raat

wo lagawaT se hama shikwe-shikayat ki raat
wo tere saya-e-gesu mein hikayat ki raat

Dol par chand hare khet fazaen KHamosh
kaisi masum hawa karti hai dehat ki raat

hashr ka roz kabhi KHatm to hoga zahid
aaegi aaegi zalim ye KHarabaat ki raat

ek jannat ke liye itna alam shaiKH-e-haram
kash hoti teri qismat mein KHarabaat ki raat

inqalab aisa bhi mumkin hai palaT de taqdir
dusri bar meri pahli mulaqat ki raat

ruh paband-e-anasir hai bas itni 'talib'
jaise mehman musafir ho koi raat ki raat

Pachas Sala Intekhab"