Subscribe to our newsletter and get our newest updates

Fani Badayuni

  • Ghazal


maal-e-soz-e-gham-ha-e-nihani dekhte jao


ma.āl-e-soz-e-ġham-hā-e-nihānī dekhte jaao
bhaḌak uTThī hai sham-e-zindagānī dekhte jaao

chale bhī aao vo hai qabr-e-'fānī' dekhte jaao
tum apne marne vaale kī nishānī dekhte jaao

abhī kyā hai kisī din ḳhuuñ rulā degī ye ḳhāmoshī
zabān-e-hāl kī jādū-bayānī dekhte jaao

ġhurūr-e-husn kā sadqa koī jaatā hai duniyā se
kisī kī ḳhaak meñ miltī javānī dekhte jaao

udhar muñh pher kar kyā zab.h karte ho idhar dekho
mirī gardan pe ḳhanjar kī ravānī dekhte jaao

bahār-e-zindagī kā lutf dekhā aur dekhoge
kisī kā aish-e-marg-e-nā-gahānī dekhte jaao

sune jaate na the tum se mire din-rāt ke shikve
kafan sarkāo merī be-zabānī dekhte jaao

vo uTThā shor-e-mātam āḳhirī dīdār-e-mayyat par
ab uTThā chāhtī hai na.ash-e-'fānī' dekhte jaao

maal-e-soz-e-gham-ha-e-nihani dekhte jao
bhaDak uTThi hai sham-e-zindagani dekhte jao

chale bhi aao wo hai qabr-e-'fani' dekhte jao
tum apne marne wale ki nishani dekhte jao

abhi kya hai kisi din KHun rula degi ye KHamoshi
zaban-e-haal ki jadu-bayani dekhte jao

ghurur-e-husn ka sadqa koi jata hai duniya se
kisi ki KHak mein milti jawani dekhte jao

udhar munh pher kar kya zabh karte ho idhar dekho
meri gardan pe KHanjar ki rawani dekhte jao

bahaar-e-zindagi ka lutf dekha aur dekhoge
kisi ka aish-e-marg-e-na-gahani dekhte jao

sune jate na the tum se mere din-raat ke shikwe
kafan sarkao meri be-zabani dekhte jao

wo uTTha shor-e-matam aaKHiri didar-e-mayyat par
ab uTTha chahti hai nash-e-'fani' dekhte jao


Leave a comment

+