labrez-e-haqīqat go afsāna-e-mūsā hai
ai husn-e-hijāb-ārā kis ne tujhe dekhā hai

mahfil sī sajā.ī hai dīdār kī hasrat ne
har-chand tirā jalva mahbūb-e-tamāshā hai

miTtā hai kabhī dil se naqsh us kī mohabbat kā
nākām tamannā bhī majbūr tamannā hai

jazbāt kī duniyā meñ barpā hai qayāmat sī
is haal meñ rū-poshī kyā aap ko zebā hai

saaqī tirī mahfil ko rañgīn kiyā jis ne
vo ḳhuun hai taqve kā yā jalva-e-mīnā hai

ik sheva taġhāful hai ik ishva tajāhul hai
ġhussa hai bajā terā shikva mirā bejā hai

ye be-dilī achchhī hai dīvāna na ban 'vahshat'
anjām tamannā kā hasrat ke sivā kyā hai

labrez-e-haqiqat go afsana-e-musa hai
ai husn-e-hijab-ara kis ne tujhe dekha hai

mahfil si sajai hai didar ki hasrat ne
har-chand tera jalwa mahbub-e-tamasha hai

miTta hai kabhi dil se naqsh us ki mohabbat ka
nakaam tamanna bhi majbur tamanna hai

jazbaat ki duniya mein barpa hai qayamat si
is haal mein ru-poshi kya aap ko zeba hai

saqi teri mahfil ko rangin kiya jis ne
wo KHun hai taqwe ka ya jalwa-e-mina hai

ek shewa taghaful hai ek ishwa tajahul hai
ghussa hai baja tera shikwa mera beja hai

ye be-dili achchhi hai diwana na ban 'wahshat'
anjam tamanna ka hasrat ke siwa kya hai

Source: Shab Khoon(Shumara Number-063)