ishq-ābād faqīroñ kī adā rakhte haiñ
aur kyā is ke sivā ahl-e-anā rakhte haiñ

ham tahī-dast kuchh aise bhī tahī-dast nahīñ
kuchh nahīñ rakhte magar pās-e-vafā rakhte haiñ

zindagī bhar kī kamā.ī ye ta.alluq hī to hai
kuchh bache yā na bache is ko bachā rakhte haiñ

sher meñ phūTte haiñ apnī zabāñ ke chhāle
nutq rakhte haiñ magar sab se judā rakhte haiñ

ham nahīñ sāhib-e-takrīm to hairat kaisī
sar pe dastār na paikar pe abā rakhte haiñ

shahr āvāz kī jhilmil se damak uTTheñge
shab-e-ḳhāmosh kī ruḳh sham-e-navā rakhte haiñ

ik tirī yaad gale aise paḌī hai ki 'najīb'
aaj kā kaam bhī ham kal pe uThā rakhte haiñ

ishq-abaad faqiron ki ada rakhte hain
aur kya is ke siwa ahl-e-ana rakhte hain

hum tahi-dast kuchh aise bhi tahi-dast nahin
kuchh nahin rakhte magar pas-e-wafa rakhte hain

zindagi bhar ki kamai ye talluq hi to hai
kuchh bache ya na bache is ko bacha rakhte hain

sher mein phuTte hain apni zaban ke chhaale
nutq rakhte hain magar sab se juda rakhte hain

hum nahin sahib-e-takrim to hairat kaisi
sar pe dastar na paikar pe aba rakhte hain

shahr aawaz ki jhilmil se damak uTThenge
shab-e-KHamosh ki ruKH sham-e-nawa rakhte hain

ek teri yaad gale aise paDi hai ki 'najib'
aaj ka kaam bhi hum kal pe uTha rakhte hain

Source: Book : Ghazal Calendar-2015 (Pg. 12.12.2015)