Subscribe to our newsletter and get our newest updates

P P Srivastava Rind

  • Ghazal


ufuq pe dudhiya saya jo panw dharne laga


ufuq pe dūdhiyā saaya jo paañv dharne lagā
muhīb raat kā shīrāza hī bikharne lagā

tamām umr jo laḌtā rahā mire andar
mirā zamīr hī mujh se farār karne lagā

safar meñ jab kabhī lā-samtiyoñ kā zikr huā
hamārā qāfila tūl-e-safar se Darne lagā

sulag rahā hai kahīñ duur dard kā jañgal
jo āsmān pe kaḌvā dhuāñ bikharne lagā

chaḌhī nadī ko maiñ pāyāb kar ke kyā aayā
tamām shahr hī dariyā ke paar karne lagā

ajiib karb se guzrā hai jugnuoñ kā julūs
kahāñ Thaharnā thā is ko kahāñ Thaharne lagā

hamāre saath rahī hai safar meñ be-ḳhabarī
junūñ meñ soch kā imkān kaam karne lagā

bahut ajiib hai bātin kī gumrahī ai 'rind'
sukūt-e-zāhirī TukḌoñ meñ thā bikharne lagā

ufuq pe dudhiya saya jo panw dharne laga
muhib raat ka shiraaza hi bikharne laga

tamam umr jo laDta raha mere andar
mera zamir hi mujh se farar karne laga

safar mein jab kabhi la-samtiyon ka zikr hua
hamara qafila tul-e-safar se Darne laga

sulag raha hai kahin dur dard ka jangal
jo aasman pe kaDwa dhuan bikharne laga

chaDhi nadi ko main payab kar ke kya aaya
tamam shahr hi dariya ke par karne laga

ajib karb se guzra hai jugnuon ka julus
kahan Thaharna tha is ko kahan Thaharne laga

hamare sath rahi hai safar mein be-KHabari
junun mein soch ka imkan kaam karne laga

bahut ajib hai baatin ki gumrahi ai 'rind'
sukut-e-zahiri TukDon mein tha bikharne laga


Source: Rooh-e-Ghazal,Pachas Sala Intekhab

Leave a comment

+