Subscribe to our newsletter and get our newest updates

Ehtimam Sadiq

  • Ghazal


dekhte hi dhaDkanen sari pareshan ho gain


dekhte hī dhaḌkaneñ saarī pareshāñ ho ga.iiñ
terī āñkheñ ai sitamgar āfat-e-jāñ ho ga.iiñ

aa gayā palkoñ pe ashkoñ ke patañgoñ kā hujūm
jab kisī kī yaad kī sham.eñ farozāñ ho ga.iiñ

phir mirī tasbīh ke daane bikhar kar rah ga.e
phir duā.eñ aaj un ke dar kī mehmāñ ho ga.iiñ

un ke har ik lams kā aisā asar mujh par huā
dil kī dīvāreñ sabhī shahr-e-nigārāñ ho ga.iiñ

ye shab-e-tanhā.ī 'sādiq' mujh ko Das letī magar
shukr hai yādeñ dar-e-dil kī nigahbāñ ho ga.iiñ

dekhte hi dhaDkanen sari pareshan ho gain
teri aankhen ai sitamgar aafat-e-jaan ho gain

aa gaya palkon pe ashkon ke patangon ka hujum
jab kisi ki yaad ki shamen farozan ho gain

phir meri tasbih ke dane bikhar kar rah gae
phir duaen aaj un ke dar ki mehman ho gain

un ke har ek lams ka aisa asar mujh par hua
dil ki diwaren sabhi shahr-e-nigaran ho gain

ye shab-e-tanhai 'sadiq' mujh ko Das leti magar
shukr hai yaaden dar-e-dil ki nigahban ho gain


Leave a comment

+