Subscribe to our newsletter and get our newest updates

Darshan Singh

  • Ghazal


wo saliqa hamein jine ka sikha de saqi


vo salīqa hameñ jiine kā sikhā de saaqī
jo ġham-e-dahr se begāna banā de saaqī

jām-o-mīnā mirī nazroñ se haTā de saaqī
ye jo āñkhoñ meñ chhalaktī hai pilā de saaqī

sho.ala-e-ishq se chhalkā de mire shīshe ko
aur betāb ko betāb banā de saaqī

haram-o-dair meñ baT jaate haiñ rindān-e-vafā
haram-o-dair kī tafrīq miTā de saaqī

sun rahā huuñ ki mayassar hī nahīñ duniyā meñ
ik nigah rāz-e-do-ālam jo batā de saaqī

ḳhushk hai mausam-e-ehsās fazā pyāsī hai
ḳhum ke ḳhum sīna-e-getī pe luñDhā de saaqī

phir kabhī hosh na aa.e to koī baat nahīñ
aaj ham jitnī piyeñ utnī pilā de saaqī

josh-e-mastī meñ baġhal-gīr huuñ bichhḌe hue dil
aaj insān ko insān banā de saaqī

zindagī ḳhvāb-e-musalsal ke sivā kuchh na sahī
us kī ta.abīr to 'darshan' ko batā de saaqī

wo saliqa hamein jine ka sikha de saqi
jo gham-e-dahr se begana bana de saqi

jam-o-mina meri nazron se haTa de saqi
ye jo aankhon mein chhalakti hai pila de saqi

shoala-e-ishq se chhalka de mere shishe ko
aur betab ko betab bana de saqi

haram-o-dair mein baT jate hain rindan-e-wafa
haram-o-dair ki tafriq miTa de saqi

sun raha hun ki mayassar hi nahin duniya mein
ek nigah raaz-e-do-alam jo bata de saqi

KHushk hai mausam-e-ehsas faza pyasi hai
KHum ke KHum sina-e-geti pe lunDha de saqi

phir kabhi hosh na aae to koi baat nahin
aaj hum jitni piyen utni pila de saqi

josh-e-masti mein baghal-gir hun bichhDe hue dil
aaj insan ko insan bana de saqi

zindagi KHwab-e-musalsal ke siwa kuchh na sahi
us ki tabir to 'darshan' ko bata de saqi


Leave a comment

+