dīvānoñ ko manzil kā patā yaad nahīñ hai
jab se tirā naqsh-e-kaf-e-pā yaad nahīñ hai

afsurdagi-e-ishq ke khulte nahīñ asbāb
kyā baat bhulā baiThe haiñ kyā yaad nahīñ hai

ham dil-zadgāñ jiite haiñ yādoñ ke sahāre
haañ miT ga.e jis par vo adā yaad nahīñ hai

ghar apnā to bhūlī hī thī āshuftagi-e-dil
ḳhud-rafta ko ab dar bhī tirā yaad nahīñ hai

lete haiñ tirā naam hī yuuñ jāgte sote
jaise ki hameñ apnā ḳhudā yaad nahīñ hai

ye ek hī ehsān-e-ġham dost hai kyā kam
be-mehri-e-daurāñ kī jafā yaad nahīñ hai

be-barse guzar jaate haiñ umDe hue bādal
jaise unheñ merā hī patā yaad nahīñ hai

is baar 'vahīd' aap kī āñkheñ nahīñ barsīñ
kyā jhūmtī zulfoñ kī ghaTā yaad nahīñ hai

diwanon ko manzil ka pata yaad nahin hai
jab se tera naqsh-e-kaf-e-pa yaad nahin hai

afsurdagi-e-ishq ke khulte nahin asbab
kya baat bhula baiThe hain kya yaad nahin hai

hum dil-zadgan jite hain yaadon ke sahaare
han miT gae jis par wo ada yaad nahin hai

ghar apna to bhuli hi thi aashuftagi-e-dil
KHud-rafta ko ab dar bhi tera yaad nahin hai

lete hain tera nam hi yun jagte sote
jaise ki hamein apna KHuda yaad nahin hai

ye ek hi ehsan-e-gham dost hai kya kam
be-mehri-e-dauran ki jafa yaad nahin hai

be-barse guzar jate hain umDe hue baadal
jaise unhen mera hi pata yaad nahin hai

is bar 'wahid' aap ki aankhen nahin barsin
kya jhumti zulfon ki ghaTa yaad nahin hai

RECITATIONS Nomaan Shauque



00:00/00:00 diwanon ko manzil ka pata yaad nahin hai Nomaan Shauque