fazā meñ dā.ere bikhre hue haiñ
ham apnī zaat meñ uljhe hue haiñ

hazār ḳhvāhishoñ ke but haiñ dil meñ
magar but bhī kabhī sachche hue haiñ

shanāsā.ī mohabbat bevafā.ī
ye sab koī mire dekhe hue haiñ

hai un kā zikr itnā mahfiloñ meñ
ham apnī dāstāñ bhūle hue haiñ

huī hai sabt un par mohr-e-ālam
vahī jo faisle dil se hue haiñ

ye dil jab tak zarā Thahrā huā hai
usī ke dam se ham Thahre hue haiñ

jalāo dil ki har saaya ho raushan
añdhere chain se baiThe hue haiñ

jo aañsū vaqt-e-ruḳhsat the amānat
vo ab tak ruuh meñ taire hue haiñ

bahut logoñ ne kī hai dard-mandī
magar ye zaḳhm kab achchhe hue haiñ

guzar jaate na jaane kitne tūfāñ
ye do āñkheñ unheñ roke hue haiñ

faza mein daere bikhre hue hain
hum apni zat mein uljhe hue hain

hazar KHwahishon ke but hain dil mein
magar but bhi kabhi sachche hue hain

shanasai mohabbat bewafai
ye sab koi mere dekhe hue hain

hai un ka zikr itna mahfilon mein
hum apni dastan bhule hue hain

hui hai sabt un par mohr-e-alam
wahi jo faisle dil se hue hain

ye dil jab tak zara Thahra hua hai
usi ke dam se hum Thahre hue hain

jalao dil ki har saya ho raushan
andhere chain se baiThe hue hain

jo aansu waqt-e-ruKHsat the amanat
wo ab tak ruh mein taire hue hain

bahut logon ne ki hai dard-mandi
magar ye zaKHm kab achchhe hue hain

guzar jate na jaane kitne tufan
ye do aankhen unhen roke hue hain