mire kamre meñ puurī chāñdnī hai
faqat terī kamī baaqī rahī hai

maiñ sahrā meñ tasallī se rahūñgā
musalsal tishnagī hī tishnagī hai

ḳhamoshī oḌh kar baiThe haiñ sab peḌ
ye bārish aaj kitnī ḳhushk sī hai

havā aa.ī hai kis duniyā se ho kar
har ik Tahnī shajar kī kāñptī hai

abhī to sardiyoñ kā daur hogā
fazā ronā thā jitnā ro chukī hai

maiñ har dīpak bujhātā jā rahā huuñ
merī duniyā meñ itnī raushnī hai

darīcha ab nahīñ khultā tumhārā
nazar lekin kisī kī māntī hai

vo jo hassās laḌkā mar gayā thā
ab us kā shauq keval shā.irī hai

kabhī Thahrā nahīñ phūloñ kā mausam
diloñ kā TuuT jaanā qudratī hai

mere kamre mein puri chandni hai
faqat teri kami baqi rahi hai

main sahra mein tasalli se rahunga
musalsal tishnagi hi tishnagi hai

KHamoshi oDh kar baiThe hain sab peD
ye barish aaj kitni KHushk si hai

hawa aai hai kis duniya se ho kar
har ek Tahni shajar ki kanpti hai

abhi to sardiyon ka daur hoga
faza rona tha jitna ro chuki hai

main har dipak bujhata ja raha hun
meri duniya mein itni raushni hai

daricha ab nahin khulta tumhaara
nazar lekin kisi ki manti hai

wo jo hassas laDka mar gaya tha
ab us ka shauq kewal shairi hai

kabhi Thahra nahin phulon ka mausam
dilon ka TuT jaana qudrati hai

Source: Book : Koi bhi rut ho (Pg. 161) Author : Farah iqbal Publication : Alhamd Publications (2011) Edition : 2011