Subscribe to our newsletter and get our newest updates

Hakeem Aagha Jan Aish

  • Ghazal


mariz-e-ishq ko hai dard-e-dil dawa ke liye


marīz-e-ishq ko hai dard-e-dil davā ke liye
rahī ġhizā so hai ḳhūn-e-jigar ġhizā ke liye

vo kārgar ho duā kyā bhalā shifā ke liye
na jab duā meñ ho DhūñDe asar davā ke liye

haiñ ab ke tez jo sahrā meñ is qadar sar-e-ḳhār
ḳhudā hī jaane ki haiñ kis barahna-pā ke liye

na kyūñki jaan de dil sadma-e-jigar sun kar
hamesha dete haiñ jaañ yaarī āshnā ke liye

ham āsiyoñ kā bhī allāh hai gar ai vaa.iz
tū mo'taqid hai ki jannat hai pārsā ke liye

jafā-e-charḳh-o-sitam-hā-e-ġhair-o-hasrat-o-ġham
ye jhagḌe jaan ko mol un se dil lagā ke liye

vo qātil aa.e to yaañ ham bhī sar hathelī par
liye phire haiñ usī ḳhanjar-āzmā ke liye

tum apnā dil liye phirte ho us ne lākhoñ dil
isī tarah se haiñ bāteñ banā banā ke liye

huā hai rañg-e-hinā 'aish' zeb-e-pā us ke
ye jā-e-rashk hai rutba ho ye hinā ke liye

mariz-e-ishq ko hai dard-e-dil dawa ke liye
rahi ghiza so hai KHun-e-jigar ghiza ke liye

wo kargar ho dua kya bhala shifa ke liye
na jab dua mein ho DhunDe asar dawa ke liye

hain ab ke tez jo sahra mein is qadar sar-e-KHar
KHuda hi jaane ki hain kis barahna-pa ke liye

na kyunki jaan de dil sadma-e-jigar sun kar
hamesha dete hain jaan yari aashna ke liye

hum aasiyon ka bhi allah hai gar ai waiz
tu mo'taqid hai ki jannat hai parsa ke liye

jafa-e-charKH-o-sitam-ha-e-ghair-o-hasrat-o-gham
ye jhagDe jaan ko mol un se dil laga ke liye

wo qatil aae to yan hum bhi sar hatheli par
liye phire hain usi KHanjar-azma ke liye

tum apna dil liye phirte ho us ne lakhon dil
isi tarah se hain baaten bana bana ke liye

hua hai rang-e-hina 'aish' zeb-e-pa us ke
ye ja-e-rashk hai rutba ho ye hina ke liye


Leave a comment

+