havā kī halkī sī aahaT pe yuuñ machal jaanā
umīd-e-vasl pe bismil kā phir sambhal jaanā

na aa rahe the na aanā thā aur na imkāñ thā
ye zo.am-e-dil thā yā qismat kā yuuñ badal jaanā

ye dil pe bojh hai dardoñ kā yā tirī yādeñ
yā ābloñ kā harārat se hai pighal jaanā

tirī talāsh meñ uTh uTh ke pāgaloñ kī tarah
shab-e-firāq meñ ghar se kahīñ nikal jaanā

ye jānte haiñ ki mumkin nahīñ tū lauT aa.e
shi.ār-e-dil hai tirī yaad se bahal jaanā

tirī umiid kā jab sar se uTh gayā āñchal
to fasl-e-gul meñ thā yaksar ḳhizāñ meñ Dhal jaanā

abhī thī tere safīne kī muntazir 'kausar'
ajab lagā tire sāhil se yuuñ phisal jaanā

hawa ki halki si aahaT pe yun machal jaana
umid-e-wasl pe bismil ka phir sambhal jaana

na aa rahe the na aana tha aur na imkan tha
ye zoam-e-dil tha ya qismat ka yun badal jaana

ye dil pe bojh hai dardon ka ya teri yaaden
ya aablon ka hararat se hai pighal jaana

teri talash mein uTh uTh ke pagalon ki tarah
shab-e-firaq mein ghar se kahin nikal jaana

ye jaante hain ki mumkin nahin tu lauT aae
shiar-e-dil hai teri yaad se bahal jaana

teri umid ka jab sar se uTh gaya aanchal
to fasl-e-gul mein tha yaksar KHizan mein Dhal jaana

abhi thi tere safine ki muntazir 'kausar'
ajab laga tere sahil se yun phisal jaana