dil kiye tasḳhīr baḳhshā faiz-e-rūhānī mujhe
hubb-e-qaumī ho gayā naqsh-e-sulaimānī mujhe

manzil-e-ibrat hai duniyā ahl-e-duniyā shaad haiñ
aisī dil-jam.ī se hotī hai pareshānī mujhe

jāñchtā huuñ vus.at-e-dil hamla-e-ġham ke liye
imtihāñ hai ranj-o-hirmāñ kī farāvānī mujhe

haq-parastī kī jo maiñ ne but-parastī chhoḌ kar
barhaman kahne lage ilhād kā baanī mujhe

kulfat-e-duniyā miTe bhī to saḳhī ke faiz se
haath dhone ko mile bahtā huā paanī mujhe

ḳhud-parastī miT ga.ī qadr-e-mohabbat baḌh ga.ī
mātam-e-ahbāb hai tālīm-e-rūhānī mujhe

qaum kā ġham mol le kar dil kā ye aalam huā
yaad bhī aatī nahīñ apnī pareshānī mujhe

zarra zarra hai mire kashmīr kā mehmāñ-navāz
raah meñ patthar ke TukḌoñ ne diyā paanī mujhe

lucknow meñ phir huī ārāsta bazm-e-suḳhan
baad muddat phir huā zauq-e-ġhazal-ḳhvānī mujhe

dil kiye tasKHir baKHsha faiz-e-ruhani mujhe
hubb-e-qaumi ho gaya naqsh-e-sulaimani mujhe

manzil-e-ibrat hai duniya ahl-e-duniya shad hain
aisi dil-jami se hoti hai pareshani mujhe

jaanchta hun wusat-e-dil hamla-e-gham ke liye
imtihan hai ranj-o-hirman ki farawani mujhe

haq-parasti ki jo main ne but-parasti chhoD kar
barhaman kahne lage ilhad ka bani mujhe

kulfat-e-duniya miTe bhi to saKHi ke faiz se
hath dhone ko mile bahta hua pani mujhe

KHud-parasti miT gai qadr-e-mohabbat baDh gai
matam-e-ahbab hai talim-e-ruhani mujhe

qaum ka gham mol le kar dil ka ye aalam hua
yaad bhi aati nahin apni pareshani mujhe

zarra zarra hai mere kashmir ka mehman-nawaz
rah mein patthar ke TukDon ne diya pani mujhe

lucknow mein phir hui aarasta bazm-e-suKHan
baad muddat phir hua zauq-e-ghazal-KHwani mujhe