vafā kī raah meñ kis kā ye naqsh-e-pā niklā
jabīn-e-shauq tirā aaj hausla niklā

sukūt-e-āḳhir-e-shab aur fasurdagī dil kī
bujhā bujhā sā tirī yaad kā diyā niklā

kamī thī kuchh tirī bazm-e-tarab meñ kyā saaqī
ki jur.a jur.a bhalā kis kā hausla niklā

kabhī baraste the la.al-o-guhar isī ghar meñ
isī makāñ se magar kāsa-e-gadā niklā

kaThin thī rāh-e-vafā duur manzil-e-jānāñ
qadam baḌhā.e to lamhoñ kā fāsla niklā

mirā fasāna to har ahd kā fasāna hai
ki lafz lafz mohabbat kā mājrā niklā

wafa ki rah mein kis ka ye naqsh-e-pa nikla
jabin-e-shauq tera aaj hausla nikla

sukut-e-aKHir-e-shab aur fasurdagi dil ki
bujha bujha sa teri yaad ka diya nikla

kami thi kuchh teri bazm-e-tarab mein kya saqi
ki jura jura bhala kis ka hausla nikla

kabhi baraste the lal-o-guhar isi ghar mein
isi makan se magar kasa-e-gada nikla

kaThin thi rah-e-wafa dur manzil-e-jaanan
qadam baDhae to lamhon ka fasla nikla

mera fasana to har ahd ka fasana hai
ki lafz lafz mohabbat ka majra nikla

Pachas Sala Intekhab"