Subscribe to our newsletter and get our newest updates

Zahida Zaidi

  • Ghazal


wo hamein rah mein mil jaen zaruri to nahin


vo hameñ raah meñ mil jaa.eñ zarūrī to nahīñ
ḳhud-ba-ḳhud fāsle miT jaa.eñ zarūrī to nahīñ

chāñd chehre ki haiñ gum vaqt ke sannāTe meñ
ham magar un ko bhulā paa.eñ zarūrī to nahīñ

jin se bichhḌe the to tārīk thī duniyā saarī
ham unheñ DhūñD ke phir laa.eñ zarūrī to nahīñ

tishnagī had se sivā aur safar jaarī hai
par sarāboñ se bahal jaa.eñ zarūrī to nahīñ

zindagī tū ne to sach hai ki vafā ham se na kī
ham magar ḳhud tujhe Thukrā.eñ zarūrī to nahīñ

jū-e-ehsās meñ larzāñ ye gurezāñ lamhāt
naġhma-e-dard meñ Dhal jaa.eñ zarūrī to nahīñ

ye to sach hai ki hai ik umr se bas ek talāsh
ham magar apnā patā paa.eñ zarūrī to nahīñ

wo hamein rah mein mil jaen zaruri to nahin
KHud-ba-KHud fasle miT jaen zaruri to nahin

chand chehre ki hain gum waqt ke sannaTe mein
hum magar un ko bhula paen zaruri to nahin

jin se bichhDe the to tarik thi duniya sari
hum unhen DhunD ke phir laen zaruri to nahin

tishnagi had se siwa aur safar jari hai
par sarabon se bahal jaen zaruri to nahin

zindagi tu ne to sach hai ki wafa hum se na ki
hum magar KHud tujhe Thukraen zaruri to nahin

ju-e-ehsas mein larzan ye gurezan lamhat
naghma-e-dard mein Dhal jaen zaruri to nahin

ye to sach hai ki hai ek umr se bas ek talash
hum magar apna pata paen zaruri to nahin


Source:

Leave a comment

+