is but se dil lagā ke bahut sochte rahe
sabr-o-sukūñ luTā ke bahut sochte rahe

jab sāmnā huā to zabāñ ruk ga.ī mirī
vo bhī nazar jhukā ke bahut sochte rahe

dīvāngī-e-shauq meñ apne hī haath se
ghar apnā ham jalā ke bahut sochte rahe

umDā jo abr yaad ne un kī rulā diyā
ḳhālī subū uThā ke bahut sochte rahe

kahte kise chaman meñ luTe āshiyāñ kī baat
tinke uThā uThā ke bahut sochte rahe

dekhā ye jab ki yās-o-tabāhī hai hashr-e-ishq
aañsū bahā bahā ke bahut sochte rahe

'āfat' bashar ne jab bhī bashar par kyā sitam
ham dukh se tilmilā ke bahut sochte rahe

is but se dil laga ke bahut sochte rahe
sabr-o-sukun luTa ke bahut sochte rahe

jab samna hua to zaban ruk gai meri
wo bhi nazar jhuka ke bahut sochte rahe

diwangi-e-shauq mein apne hi hath se
ghar apna hum jala ke bahut sochte rahe

umDa jo abr yaad ne un ki rula diya
KHali subu uTha ke bahut sochte rahe

kahte kise chaman mein luTe aashiyan ki baat
tinke uTha uTha ke bahut sochte rahe

dekha ye jab ki yas-o-tabahi hai hashr-e-ishq
aansu baha baha ke bahut sochte rahe

'afat' bashar ne jab bhi bashar par kya sitam
hum dukh se tilmila ke bahut sochte rahe