Subscribe to our newsletter and get our newest updates

Nafeer Sarmadi

  • Ghazal


sile hon lab zabanen band to baaten nahin hotin


sile hoñ lab zabāneñ band to bāteñ nahīñ hotīñ
muḳhālif rāste hoñ to mulāqāteñ nahīñ hotīñ

ye insānoñ pe insānoñ kī fauqiyyat ajab shai hai
ragoñ kī dauḌtī surḳhī meñ to zāteñ nahīñ hotīñ

likhī jaatī haiñ sañgīnoñ se āzādī kī tahrīreñ
kahīñ ḳhud pesh āzādī kī sauġhāteñ nahīñ hotīñ

jahāñ shab-ḳhūn maarā jā sake ḳhvābīda logoñ par
kisī bedār millat meñ to vo rāteñ nahīñ hotīñ

ghaTā se chhīnte haiñ īstāda koh bārish ko
zamīñ par leTe sahrāoñ par barsāteñ nahīñ hotīñ

'nafīr' is daur-e-ḳhud-āgāh insānoñ kī duniyā meñ
kahīñ haavī javāñ mardoñ pe āfāteñ nahīñ hotīñ

sile hon lab zabanen band to baaten nahin hotin
muKHalif raste hon to mulaqaten nahin hotin

ye insanon pe insanon ki fauqiyyat ajab shai hai
ragon ki dauDti surKHi mein to zaten nahin hotin

likhi jati hain sanginon se aazadi ki tahriren
kahin KHud pesh aazadi ki saughaten nahin hotin

jahan shab-KHun mara ja sake KHwabida logon par
kisi bedar millat mein to wo raaten nahin hotin

ghaTa se chhinte hain istada koh barish ko
zamin par leTe sahraon par barsaten nahin hotin

'nafir' is daur-e-KHud-agah insanon ki duniya mein
kahin hawi jawan mardon pe aafaten nahin hotin


Source: Book : Shora-e-London (Pg. 171) Author : Jauhar Zahiri Publication : Books From India (U.K) Ltd. 45, Museum Street,Londan W.C-1 (1985) Edition : 1985

Leave a comment

+