ro-dho ke sab kuchh achchhā ho jaatā hai
man jaise rūThā bachcha ho jaatā hai

kitnā gahrā lagtā hai ġham kā sāġhar
ashk bahā luuñ to uthlā ho jaatā hai

logoñ ko bas yaad rahegā tāj-mahal
chhappar vaalā ghar qissa ho jaatā hai

miT jaatī hai miTTī kī soñdhī ḳhushbū
kahne ko to ghar pakkā ho jaatā hai

niiñd ke ḳhvāb khulī āñkhoñ se jab dekhūñ
dil kā ik konā ġhussa ho jaatā hai

ro-dho ke sab kuchh achchha ho jata hai
man jaise ruTha bachcha ho jata hai

kitna gahra lagta hai gham ka saghar
ashk baha lun to uthla ho jata hai

logon ko bas yaad rahega taj-mahal
chhappar wala ghar qissa ho jata hai

miT jati hai miTTi ki sondhi KHushbu
kahne ko to ghar pakka ho jata hai

nind ke KHwab khuli aankhon se jab dekhun
dil ka ek kona ghussa ho jata hai

Source: Book : Lamhon Ki Aawaz (Pg. 173) Author : Owais Ahmad Dauran Publication : label litho press Ramna Road Patna-4 (1974) Edition : 1974