Subscribe to our newsletter and get our newest updates

Wali Aasi

  • Ghazal


main jab chhoTa sa tha kaghaz pe ye manzar banata tha


maiñ jab chhoTā sā thā kāġhaz pe ye manzar banātā thā
khujūroñ ke daraḳhtoñ ke tale ik ghar banātā thā

maiñ āñkheñ band kar ke sochtā rahtā thā pahroñ tak
ḳhayāloñ meñ bahut nāzuk sā ik paikar banātā thā

maiñ akasr āsmāñ ke chāñd taare toḌ laatā thā
aur ik nannhī sī guḌiyā ke liye zevar banātā thā

uḌā kar roz le jaatī thiiñ maujeñ mere ḳhvāboñ ko
magar maiñ bhī gharauñde roz sāhil par banātā thā

mirī bastī meñ mere ḳhuun ke pyāse the sab lekin
na maiñ talvār gaḌhtā thā na maiñ ḳhanjar banātā thā

hidāyat-kār is duniyā ke nāTak meñ mujhe 'vālī'
kabhī hero banātā thā kabhī joker banātā thā

main jab chhoTa sa tha kaghaz pe ye manzar banata tha
khujuron ke daraKHton ke tale ek ghar banata tha

main aankhen band kar ke sochta rahta tha pahron tak
KHayalon mein bahut nazuk sa ek paikar banata tha

main akasr aasman ke chand tare toD lata tha
aur ek nannhi si guDiya ke liye zewar banata tha

uDa kar roz le jati thin maujen mere KHwabon ko
magar main bhi gharaunde roz sahil par banata tha

meri basti mein mere KHun ke pyase the sab lekin
na main talwar gaDhta tha na main KHanjar banata tha

hidayat-kar is duniya ke naTak mein mujhe 'wali'
kabhi hero banata tha kabhi joker banata tha


Leave a comment

+