ham aaj apnā muqaddar badal ke dekhte haiñ
tumhāre saath bhī kuchh duur chal ke dekhte haiñ

udhar charāġh bujhāne ko hai havā betāb
idhar ye zid ki havāoñ meñ jal ke dekhte haiñ

chalo phir aaj zamīnoñ meñ jazb ho jaa.eñ
chhalak ke aañkh se bāhar nikal ke dekhte haiñ

ye ishq koī balā hai junūn hai kyā hai
ye kaisī aag hai patthar pighal ke dekhte haiñ

ajiib pyaas hai dariyā se bujh nahīñ paa.ī
jo tum kaho to samundar nigal ke dekhte haiñ

vo gar nigāh milā le to mo.ajiza kar de
isī liye to udhar ham sambhal ke dekhte haiñ

badal ke ḳhud hī hamīñ rah ga.e zamāne meñ
chale the ghar se ki duniyā badal ke dekhte haiñ

hum aaj apna muqaddar badal ke dekhte hain
tumhaare sath bhi kuchh dur chal ke dekhte hain

udhar charagh bujhane ko hai hawa betab
idhar ye zid ki hawaon mein jal ke dekhte hain

chalo phir aaj zaminon mein jazb ho jaen
chhalak ke aankh se bahar nikal ke dekhte hain

ye ishq koi bala hai junun hai kya hai
ye kaisi aag hai patthar pighal ke dekhte hain

ajib pyas hai dariya se bujh nahin pai
jo tum kaho to samundar nigal ke dekhte hain

wo gar nigah mila le to moajiza kar de
isi liye to udhar hum sambhal ke dekhte hain

badal ke KHud hi hamin rah gae zamane mein
chale the ghar se ki duniya badal ke dekhte hain