har shai vahī nahīñ hai jo parchhā.iyoñ meñ hai
is ke sivā kuchh aur bhī gahrā.iyoñ meñ hai

ā.īna jis se TuuT ke be-āb ho gayā
vo aks-e-be-navā bhī tamāshā.iyoñ meñ hai

fursat mile to maiñ bhī koī marsiya likhūñ
ik dasht-e-karbalā mirī tanhā.iyoñ meñ hai

kis shahr meñ talāsh kareñ rishta-e-vafā
sunte to haiñ purānī shanāsā.iyoñ meñ hai

dariyā ke zor-o-shor pe bāteñ hazār hoñ
paanī magar vahī hai jo gahrā.iyoñ meñ hai

ghul jaa.e sher meñ to zamīñ āsmāñ bane
vo husn-e-lā-zavāl jo sachchā.iyoñ meñ hai

bekār us ko ahl-e-vafā meñ ginā gayā
'nāmī' kahāñ se aap ke shaidā.iyoñ meñ hai

har shai wahi nahin hai jo parchhaiyon mein hai
is ke siwa kuchh aur bhi gahraiyon mein hai

aaina jis se TuT ke be-ab ho gaya
wo aks-e-be-nawa bhi tamashaiyon mein hai

fursat mile to main bhi koi marsiya likhun
ek dasht-e-karbala meri tanhaiyon mein hai

kis shahr mein talash karen rishta-e-wafa
sunte to hain purani shanasaiyon mein hai

dariya ke zor-o-shor pe baaten hazar hon
pani magar wahi hai jo gahraiyon mein hai

ghul jae sher mein to zamin aasman bane
wo husn-e-la-zawal jo sachchaiyon mein hai

bekar us ko ahl-e-wafa mein gina gaya
'nami' kahan se aap ke shaidaiyon mein hai

Source: Book : Ghazal Calendar-2015 (Pg. 10.10.2015)