junūñ hai zehn meñ to hausle talāsh karo
misāl-e-āb-e-ravāñ rāste talāsh karo

ye iztirāb ragoñ meñ bahut zarūrī hai
uTho safar ke na.e silsile talāsh karo

ye sar-zamīn safar ke liye bahut kam hai
chalo ufaq pe na.e marhale talāsh karo

jo thak ga.e ho ye bosīda zindagī jī kar
to zindagī ke alag zāviye talāsh karo

jo chāhte ho ki aḳhbār chal paḌe apnā
to surḳhiyoñ ke liye hādse talāsh karo

ye tañg-zauq adīboñ se ḳhush nahīñ hoñge
mushā.ere ke liye masḳhare talāsh karo

ḳhudā pe chhoḌ do ye kal koī paḌhe na paḌhe
na.ī ġhazal ke liye qāfiye talāsh karo

junun hai zehn mein to hausle talash karo
misal-e-ab-e-rawan raste talash karo

ye iztirab ragon mein bahut zaruri hai
uTho safar ke nae silsile talash karo

ye sar-zamin safar ke liye bahut kam hai
chalo ufaq pe nae marhale talash karo

jo thak gae ho ye bosida zindagi ji kar
to zindagi ke alag zawiye talash karo

jo chahte ho ki aKHbar chal paDe apna
to surKHiyon ke liye hadse talash karo

ye tang-zauq adibon se KHush nahin honge
mushaere ke liye masKHare talash karo

KHuda pe chhoD do ye kal koi paDhe na paDhe
nai ghazal ke liye qafiye talash karo