raat jo mauj-e-havā ne gul se dil kī baat kahī
ik ik barg-e-chaman ne kaisī kaisī baat kahī

āñkheñ rañg ba-rañg saje rastoñ sarshār huiiñ
dil kī ḳhalish ne manzar manzar ek hī baat kahī

har iz.har kī tah meñ ek hī ma.ānī pinhā the
apnī taraf se sab ne apnī apnī baat kahī

aaj bhī harf o bayāñ ke sab paimāne hairāñ haiñ
kaise ġhazal ne do satroñ meñ puurī baat kahī

sīdhe-sāde se lafzoñ meñ kahnā mushkil thā
is liye to aisī aaḌī tirchhī baat kahī

tum kyuuñ apnī marzī ke mafhūm nikālo ho
utnā hī matlab hai hamārā jitnī baat kahī

tum bhī to mazmūn-tarāshī meñ masrūf rahe
tum ne bhī to 'ālī' kam kam aslī baat kahī

raat jo mauj-e-hawa ne gul se dil ki baat kahi
ek ek barg-e-chaman ne kaisi kaisi baat kahi

aankhen rang ba-rang saje raston sarshaar huin
dil ki KHalish ne manzar manzar ek hi baat kahi

har izhar ki tah mein ek hi maani pinha the
apni taraf se sab ne apni apni baat kahi

aaj bhi harf o bayan ke sab paimane hairan hain
kaise ghazal ne do satron mein puri baat kahi

sidhe-sade se lafzon mein kahna mushkil tha
is liye to aisi aaDi tirchhi baat kahi

tum kyun apni marzi ke mafhum nikalo ho
utna hi matlab hai hamara jitni baat kahi

tum bhi to mazmun-tarashi mein masruf rahe
tum ne bhi to 'ali' kam kam asli baat kahi

Source: Funoon(Jadeed Ghazal Number: Volume-002)