dil tamām ā.īne tiira kaun raushan kaun
ab ye aañkh hī jaane dostoñ meñ dushman kaun

yā jigar meñ ḳhuuñ kam thā yā abhī junūñ kam thā
dasht ke evaz kartā varna qasd-e-gulshan kaun

ik nashāt-ārā.ī ik sukūn-e-tanhā.ī
hijr yā visāl achchhā hal kare ye uljhan kaun

silsile mohabbat ke naam se nahīñ chalte
apnī zaat jo taj de shaiḳh kyā barahman kaun

ik na.ī lagan baḳhshe ik faqat thakan baḳhshe
mardum-āzmā niklā rahnumā ki rahzan kaun

ishq be-ḳhabar guzre ḳhair-o-shar ke uqdoñ se
aarzū kī siitā ko raam kaun rāvan kaun

ḳhāma-e-suḳhanvar yā jazb-e-andrūñ 'gauhar'
fan ke sar pe rakhtā hai tāj-e-azmat-e-fan kaun

dil tamam aaine tera kaun raushan kaun
ab ye aankh hi jaane doston mein dushman kaun

ya jigar mein KHun kam tha ya abhi junun kam tha
dasht ke ewaz karta warna qasd-e-gulshan kaun

ek nashat-arai ek sukun-e-tanhai
hijr ya visal achchha hal kare ye uljhan kaun

silsile mohabbat ke nam se nahin chalte
apni zat jo taj de shaiKH kya barahman kaun

ek nai lagan baKHshe ek faqat thakan baKHshe
mardum-azma nikla rahnuma ki rahzan kaun

ishq be-KHabar guzre KHair-o-shar ke uqdon se
aarzu ki sita ko ram kaun rawan kaun

KHama-e-suKHanwar ya jazb-e-andrun 'gauhar'
fan ke sar pe rakhta hai taj-e-azmat-e-fan kaun

Source: Deewan-e-Daud Aurangabadi