vo nairañg-e-ulfat ko kyā jāntā hai
ki apne se mujh ko judā jāntā hai

kuchh aisī to dushman meñ ḳhūbī nahīñ hai
magar tū ḳhudā jaane kyā jāntā hai

ye muñh se to kahtā huuñ chhoḌī mohabbat
magar haal dil kā ḳhudā jāntā hai

tumhārī sharārat ko kyā jaane koī
ye maiñ jānūñ yā dil mirā jāntā hai

'zahīr' apne aiboñ ko maiñ jāntā huuñ
zamāna mujhe pārsā jāntā hai

wo nairang-e-ulfat ko kya jaanta hai
ki apne se mujh ko juda jaanta hai

kuchh aisi to dushman mein KHubi nahin hai
magar tu KHuda jaane kya jaanta hai

ye munh se to kahta hun chhoDi mohabbat
magar haal dil ka KHuda jaanta hai

tumhaari shararat ko kya jaane koi
ye main jaanun ya dil mera jaanta hai

'zahir' apne aibon ko main jaanta hun
zamana mujhe parsa jaanta hai