ghar kī dahlīz se bāzār meñ mat aa jaanā
tum kisī chashm-e-ḳharīdār meñ mat aa jaanā

ḳhaak uḌānā inhīñ galiyoñ meñ bhalā lagtā hai
chalte phirte kisī darbār meñ mat aa jaanā

yūñhī ḳhushbū kī tarah phailte rahnā har sū
tum kisī dām-e-talabgār meñ mat aa jaanā

duur sāhil pe khaḌe rah ke tamāshā karnā
kisī ummīd ke mañjdhār meñ mat aa jaanā

achchhe lagte ho ki ḳhud-sar nahīñ ḳhuddār ho tum
haañ simaT ke but-e-pindār meñ mat aa jaanā

chāñd kahtā huuñ to matlab na ġhalat lenā tum
raat ko rauzan-e-dīvār meñ mat aa jaanā

ghar ki dahliz se bazar mein mat aa jaana
tum kisi chashm-e-KHaridar mein mat aa jaana

KHak uDana inhin galiyon mein bhala lagta hai
chalte phirte kisi darbar mein mat aa jaana

yunhi KHushbu ki tarah phailte rahna har su
tum kisi dam-e-talabgar mein mat aa jaana

dur sahil pe khaDe rah ke tamasha karna
kisi ummid ke manjdhaar mein mat aa jaana

achchhe lagte ho ki KHud-sar nahin KHuddar ho tum
han simaT ke but-e-pindar mein mat aa jaana

chand kahta hun to matlab na ghalat lena tum
raat ko rauzan-e-diwar mein mat aa jaana

Videos
This video is playing from YouTube Videos
This video is playing from YouTube Unknown