kab vo zāhir hogā aur hairān kar degā mujhe
jitnī bhī mushkil meñ huuñ āsān kar degā mujhe

rū-ba-rū kar ke kabhī apne mahakte surḳh hoñT
ek do pal ke liye gul-dān kar degā mujhe

ruuh phūñkegā mohabbat kī mire paikar meñ vo
phir vo apne sāmne be-jān kar degā mujhe

ḳhvāhishoñ kā ḳhuuñ bahā.egā sar-e-bāzār-e-shauq
aur mukammal be-e-sar-o-sāmān kar degā mujhe

munhadim kar degā aa kar saarī tāmīrāt-e-dil
dekhte hī dekhte vīrān kar degā mujhe

ek nā-maujūdgī rah jā.egī chāroñ taraf
rafta rafta is qadar sunsān kar degā mujhe

yā to mujh se vo chhuḌā degā ġhazal-goī 'zafar'
yā kisī din sāhab-e-dīvān kar degā mujhe

kab wo zahir hoga aur hairan kar dega mujhe
jitni bhi mushkil mein hun aasan kar dega mujhe

ru-ba-ru kar ke kabhi apne mahakte surKH honT
ek do pal ke liye gul-dan kar dega mujhe

ruh phunkega mohabbat ki mere paikar mein wo
phir wo apne samne be-jaan kar dega mujhe

KHwahishon ka KHun bahaega sar-e-bazar-e-shauq
aur mukammal be-e-sar-o-saman kar dega mujhe

munhadim kar dega aa kar sari tamiraat-e-dil
dekhte hi dekhte viran kar dega mujhe

ek na-maujudgi rah jaegi chaaron taraf
rafta rafta is qadar sunsan kar dega mujhe

ya to mujh se wo chhuDa dega ghazal-goi 'zafar'
ya kisi din sahab-e-diwan kar dega mujhe

RECITATIONS Nomaan Shauque



00:00/00:00 kab wo zahir hoga aur hairan kar dega mujhe Nomaan Shauque