Subscribe to our newsletter and get our newest updates

Mahir Bilgrami

  • Ghazal


masti-e-do-alam ek markaz pe simaT aai


mastī-e-do-ālam ik markaz pe simaT aa.ī
so kar vo uThā kuchh yuuñ letā huā añgḌā.ī

pur-shauq nazar merī kuchh dekh ke lalchā.ī
kuchh us ke ishāroñ se vo hausla-afzā.ī

yak-laḳht hue ruḳhsat sab sabr-o-shakebā.ī
taḌpā ga.ī jab aa.ī us samt se purvā.ī

kyā us kā asar us par majma.a ho ki tanhā.ī
dīvāna to dīvāna saudā.ī to saudā.ī

parvāna hai dīvāna lau sham.a kī tharrā.ī
kyā rañg-e-vafā laa.ī ik pal kī shanāsā.ī

farhād gahe majnūñ ban kar yahāñ jab aa.e
rūdād-e-junūñ ham ne har martaba dohrā.ī

merī hī badaulat vo mash.hūr-e-do-ālam haiñ
rusvā.ī-e-ulfat ye un ke baḌe kaam aa.ī

pursān-e-alam hote rasman hī kabhī sāhab
zahmat na ga.ī itnī bhī aap se farmā.ī

ai bād-e-sabā jā kar un se tū hī ye kah de
dīdār kā ḳhvāhāñ huuñ milne kā tamannā.ī

maiñ chup huuñ magar kahiye kyā haal hai ye āḳhir
māthe pe pasīnā hai āvāz hai bharā.ī

bīmār-e-mohabbat kā bas ab hai ḳhudā-hāfiz
kaam aa.ī masīhā kī kuchh bhī na masīhā.ī

kyā vo bhī zamāna thā me.arāj-e-mohabbat kā
din-rāt dar-e-jānāñ par nāsiya-farsā.ī

chāhe jise de zillat chāhe jise de izzat
raa.ī ko kare parbat parbat ko kare raa.ī

bas yūñhī samjhe ab hāl-e-dil-e-afsurda
chiñgārī dahaktī ik jis tarah ho kajlā.ī

bāzār-e-nigārāñ kā manzar vo are tauba
sāñche meñ Dhalī har shai ik paikar-e-rānā.ī

gardūñ pe mah-e-nau phir dikhlā.ī diyā 'māhir'
phir īd-e-mubārak kī har-sū se sadā aa.ī

masti-e-do-alam ek markaz pe simaT aai
so kar wo uTha kuchh yun leta hua angDai

pur-shauq nazar meri kuchh dekh ke lalchai
kuchh us ke ishaaron se wo hausla-afzai

yak-laKHt hue ruKHsat sab sabr-o-shakebai
taDpa gai jab aai us samt se purwai

kya us ka asar us par majma ho ki tanhai
diwana to diwana saudai to saudai

parwana hai diwana lau shama ki tharrai
kya rang-e-wafa lai ek pal ki shanasai

farhad gahe majnun ban kar yahan jab aae
rudad-e-junun hum ne har martaba dohrai

meri hi badaulat wo mashhur-e-do-alam hain
ruswai-e-ulfat ye un ke baDe kaam aai

pursan-e-alam hote rasman hi kabhi sahab
zahmat na gai itni bhi aap se farmai

ai baad-e-saba ja kar un se tu hi ye kah de
didar ka KHwahan hun milne ka tamannai

main chup hun magar kahiye kya haal hai ye aaKHir
mathe pe pasina hai aawaz hai bharai

bimar-e-mohabbat ka bas ab hai KHuda-hafiz
kaam aai masiha ki kuchh bhi na masihai

kya wo bhi zamana tha mearaj-e-mohabbat ka
din-raat dar-e-jaanan par nasiya-farsai

chahe jise de zillat chahe jise de izzat
rai ko kare parbat parbat ko kare rai

bas yunhi samjhe ab haal-e-dil-e-afsurda
chingari dahakti ek jis tarah ho kajlai

bazar-e-nigaran ka manzar wo are tauba
sanche mein Dhali har shai ek paikar-e-ranai

gardun pe mah-e-nau phir dikhlai diya 'mahir'
phir id-e-mubarak ki har-su se sada aai


Leave a comment

+