apnī dhuup meñ bhī kuchh jal
har saaye ke saath na Dhal

lafzoñ ke phūloñ pe na jā
dekh saroñ par chalte hal

duniyā barf kā tuudā hai
jitnā jal saktā hai jal

ġham kī nahīñ āvāz koī
kāġhaz kaale kartā chal

ban ke lakīreñ ubhre haiñ
māthe par rāhoñ ke bal

maiñ ne terā saath diyā
mere muñh par kālak mal

aas ke phuul khile 'bāqī'
dil se guzrā phir bādal

apni dhup mein bhi kuchh jal
har saye ke sath na Dhal

lafzon ke phulon pe na ja
dekh saron par chalte hal

duniya barf ka tuda hai
jitna jal sakta hai jal

gham ki nahin aawaz koi
kaghaz kale karta chal

ban ke lakiren ubhre hain
mathe par rahon ke bal

main ne tera sath diya
mere munh par kalak mal

aas ke phul khile 'baqi'
dil se guzra phir baadal