Subscribe to our newsletter and get our newest updates

Haidar Qureshi

  • Ghazal


lafz teri yaad ke sab be-sada kar aae hain


lafz terī yaad ke sab be-sadā kar aa.e haiñ
saare manzar ā.inoñ se ḳhud miTā kar aa.e haiñ

jal chuke saarī mahaktī ḳhvāhishoñ ke jab gulāb
mausamoñ ke dukh nigāhoñ meñ jalā kar aa.e haiñ

ek lamhe meñ ka.ī sadiyoñ ke naate toḌ kar
sochte haiñ apne hāthoñ se ye kyā kar aa.e haiñ

rāste to kho chuke the apnī har pahchān tak
ham janāze manziloñ ke ḳhud uThā kar aa.e hai

saare rishte jhuuT haiñ saare ta.alluq par fareb
phir bhī sab qaa.em raheñ ye bad-duā kar aa.e haiñ

har chhalakte ashk meñ tasvīr jhalkegī tirī
naqsh paanī par tirā anmiT banā kar aa.e haiñ

maut se pahle jahāñ meñ chand sāñsoñ kā azaab
zindagī jo qarz terā thā adā kar aa.e haiñ

saare shikve bhuul kar aao mileñ 'haidar' unheñ
vo ga.e lamhoñ ko phir vāpas bulā kar aa.e haiñ

lafz teri yaad ke sab be-sada kar aae hain
sare manzar aainon se KHud miTa kar aae hain

jal chuke sari mahakti KHwahishon ke jab gulab
mausamon ke dukh nigahon mein jala kar aae hain

ek lamhe mein kai sadiyon ke nate toD kar
sochte hain apne hathon se ye kya kar aae hain

raste to kho chuke the apni har pahchan tak
hum janaze manzilon ke KHud uTha kar aae hai

sare rishte jhuT hain sare talluq par fareb
phir bhi sab qaem rahen ye bad-dua kar aae hain

har chhalakte ashk mein taswir jhalkegi teri
naqsh pani par tera anmiT bana kar aae hain

maut se pahle jahan mein chand sanson ka azab
zindagi jo qarz tera tha ada kar aae hain

sare shikwe bhul kar aao milen 'haidar' unhen
wo gae lamhon ko phir wapas bula kar aae hain


Source: Intikhab-e-Sukhan,Volume-001

Leave a comment

+