kyuuñ añdheroñ meñ raheñ raat basar hone tak
ḳhud hī ḳhurshīd na ban jaa.eñ sahar hone tak

kitnā achchhā ho ki is baar marīz-e-shab-e-ġham
achchhā ho jaa.e masīhā ko ḳhabar hone tak

kitnī hī baar ḳhayāloñ meñ tire paas ga.e
ham-safar karte rahe vaqt-e-safar hone tak

hai ye tash.hīr-e-mohabbat to kahīñ ba.ad kī chiiz
aap mil sakte haiñ duniyā ko ḳhabar hone tak

dāġh-e-dil apnī hī sozish se banā hai ḳhurshīd
aur kyā guzregī qatre pe guhar hone tak

ai dil-e-va.ada-talab phir koī tajvīz-e-vafā
ik nazar aur bhī tā.īd-e-nazar hone tak

tere saath apne bhī jiine kī duā.eñ māñgīñ
ham-safar saath rahe ḳhatm-e-safar hone tak

had bhī hotī hai koī tishna-labī kī 'nūrī'
ḳhud hī pī lete haiñ saaqī kī nazar hone tak

kyun andheron mein rahen raat basar hone tak
KHud hi KHurshid na ban jaen sahar hone tak

kitna achchha ho ki is bar mariz-e-shab-e-gham
achchha ho jae masiha ko KHabar hone tak

kitni hi bar KHayalon mein tere pas gae
ham-safar karte rahe waqt-e-safar hone tak

hai ye tashhir-e-mohabbat to kahin baad ki chiz
aap mil sakte hain duniya ko KHabar hone tak

dagh-e-dil apni hi sozish se bana hai KHurshid
aur kya guzregi qatre pe guhar hone tak

ai dil-e-wada-talab phir koi tajwiz-e-wafa
ek nazar aur bhi taid-e-nazar hone tak

tere sath apne bhi jine ki duaen mangin
ham-safar sath rahe KHatm-e-safar hone tak

had bhi hoti hai koi tishna-labi ki 'nuri'
KHud hi pi lete hain saqi ki nazar hone tak

Pachas Sala Intekhab"