zulfeñ siina naaf kamar
ek nadī meñ kitne bhañvar

sadiyoñ sadiyoñ merā safar
manzil manzil rāhguzar

kitnā mushkil kitnā kaThin
jiine se jiine kā hunar

gaañv meñ aa kar shahr base
gaañv bichāre jaa.eñ kidhar

phūñkne vaale sochā bhī
phailegī ye aag kidhar

laakh tarah se naam tirā
baiThā likkhūñ kāġhaz par

chhoTe chhoTe zehn ke log
ham se un kī baat na kar

peT pe patthar bāñdh na le
haath meñ sajte haiñ patthar

raat ke pīchhe raat chale
ḳhvāb huā har ḳhvāb-e-sahar

shab bhar to āvāra phire
lauT chaleñ ab apne ghar

zulfen sina naf kamar
ek nadi mein kitne bhanwar

sadiyon sadiyon mera safar
manzil manzil rahguzar

kitna mushkil kitna kaThin
jine se jine ka hunar

ganw mein aa kar shahr base
ganw bichaare jaen kidhar

phunkne wale socha bhi
phailegi ye aag kidhar

lakh tarah se nam tera
baiTha likkhun kaghaz par

chhoTe chhoTe zehn ke log
hum se un ki baat na kar

peT pe patthar bandh na le
hath mein sajte hain patthar

raat ke pichhe raat chale
KHwab hua har KHwab-e-sahar

shab bhar to aawara phire
lauT chalen ab apne ghar

Videos
This video is playing from YouTube Videos
This video is playing from YouTube Unknown RECITATIONS Nomaan Shauque



00:00/00:00 zulfen sina naf kamar Nomaan Shauque