na kar paa.e dushman bhī jo dushmanī meñ
kiyā hai rafīqoñ ne vo dostī meñ

buzurgoñ se paayā hai ye raaz ham ne
hai jiine kī lazzat faqat sādgī meñ

abas hai ibādat abas is kā taqvā
agar ādamiyat nahīñ aadmī meñ

falak tak agar tū gayā bhī to kyā hai
bahut fāsla hai abhī āgahī meñ

zamāne ko ab koī kaise batā.e
baḌī tīrgī hai na.ī raushnī meñ

bahādur marā ek hī baar 'lāġhar'
ka.ī baar buzdil marā zindagī meñ

na kar pae dushman bhi jo dushmani mein
kiya hai rafiqon ne wo dosti mein

buzurgon se paya hai ye raaz hum ne
hai jine ki lazzat faqat sadgi mein

abas hai ibaadat abas is ka taqwa
agar aadamiyat nahin aadmi mein

falak tak agar tu gaya bhi to kya hai
bahut fasla hai abhi aagahi mein

zamane ko ab koi kaise batae
baDi tirgi hai nai raushni mein

bahadur mara ek hi bar 'laghar'
kai bar buzdil mara zindagi mein

Source: Book : siip-volume-47 (Pg. 52)