aap hī apnā maiñ dushman ho gayā
tap gayā sonā to kundan ho gayā

aur nikhrā sub.h-e-kāzib kā suhāg
ḳhatm jab tāroñ kā īñdhan ho gayā

kis se pūchhūñ kho ga.ī siitā kahāñ
ban kā har saaya hī rāvan ho gayā

jab dar-o-dīvār chamkā.e ga.e
ghar kā ghar hī un kā darpan ho gayā

bad-nasībī qāfile kī dekhiye
jo banā rahbar vo rahzan ho gayā

vo nahīñ to un kā har lamha ḳhayāl
har-nafas par ek uljhan ho gayā

māñgte phirte haiñ gul ḳhāroñ se chhāñv
kyā se kyā dastūr-e-gulshan ho gayā

phir na bichhḌe is tarah se mil ga.e
jaise do sāyoñ kā bandhan ho gayā

be-ḳhayālī meñ yūñhī phailā thā haath
jab chhuā tum ne to dāman ho gayā

jaane kyuuñ gum ho ga.ī barkhā kī dhuup
ruḳh mirā jab sū-e-chilman ho gayā

aap hi apna main dushman ho gaya
tap gaya sona to kundan ho gaya

aur nikhra subh-e-kazib ka suhag
KHatm jab taron ka indhan ho gaya

kis se puchhun kho gai sita kahan
ban ka har saya hi rawan ho gaya

jab dar-o-diwar chamkae gae
ghar ka ghar hi un ka darpan ho gaya

bad-nasibi qafile ki dekhiye
jo bana rahbar wo rahzan ho gaya

wo nahin to un ka har lamha KHayal
har-nafas par ek uljhan ho gaya

mangte phirte hain gul KHaron se chhanw
kya se kya dastur-e-gulshan ho gaya

phir na bichhDe is tarah se mil gae
jaise do sayon ka bandhan ho gaya

be-KHayali mein yunhi phaila tha hath
jab chhua tum ne to daman ho gaya

jaane kyun gum ho gai barkha ki dhup
ruKH mera jab su-e-chilman ho gaya