hastī hai judā.ī se us kī jab vasl huā to kuchh bhī nahīñ
dariyā meñ na thā to qatra thā dariyā meñ milā to kuchh bhī nahīñ

ik sham.a jalī to mahfil meñ har samt ujālā phail gayā
qānūn yahī hai fitrat kā parvāna jalā to kuchh bhī nahīñ

sailāb meñ tinke raqsāñ the maujoñ se safīne larzāñ the
ik dariyā thā sau tūfāñ the dariyā na rahā to kuchh bhī nahīñ

asliyat thī yā dhoka thā ik fitna-e-rañgīñ barpā thā
sau jalve the ik parda thā parda na rahā to kuchh bhī nahīñ

tūfāñ bhī thā āñdhī bhī thī bārāñ bhī thā bijlī bhī thī
aa.ī jo ghaTā to sab kuchh thā barsī jo ghaTā to kuchh bhī nahīñ

phūloñ se chaman ābād bhī the daam apnā liye sayyād bhī the
sab kuchh thā 'jamīl' is gulshan meñ badlī jo havā to kuchh bhī nahīñ

hasti hai judai se us ki jab wasl hua to kuchh bhi nahin
dariya mein na tha to qatra tha dariya mein mila to kuchh bhi nahin

ek shama jali to mahfil mein har samt ujala phail gaya
qanun yahi hai fitrat ka parwana jala to kuchh bhi nahin

sailab mein tinke raqsan the maujon se safine larzan the
ek dariya tha sau tufan the dariya na raha to kuchh bhi nahin

asliyat thi ya dhoka tha ek fitna-e-rangin barpa tha
sau jalwe the ek parda tha parda na raha to kuchh bhi nahin

tufan bhi tha aandhi bhi thi baran bhi tha bijli bhi thi
aai jo ghaTa to sab kuchh tha barsi jo ghaTa to kuchh bhi nahin

phulon se chaman aabaad bhi the dam apna liye sayyaad bhi the
sab kuchh tha 'jamil' is gulshan mein badli jo hawa to kuchh bhi nahin

RECITATIONS Nomaan Shauque



00:00/00:00 hasti hai judai se uski jab wasl hua to kuchh bhi nahin Nomaan Shauque

Source: Naqsh,Shumara No. 003