Subscribe to our newsletter and get our newest updates

Wahshat Raza Ali Kalkatvi

  • Ghazal


wahshat-e-mubtala KHuda ke liye


'vahshat'-e-mubtalā ḳhudā ke liye
jaan detā hai kyuuñ vafā ke liye

āshnā sab hue haiñ begāne
ek begāna-āshnā ke liye

ham ne aalam se bevafā.ī kī
ek māshūq-e-bevafā ke liye

thā use zauq-e-āshiq-āzārī
ḳhuub maiñ ne maze jafā ke liye

ġhālib aa.ī farāmushī us kī
vaada taḌpā kiyā vafā ke liye

ye bhī terī gadā-navāzī thī
maiñ ne bose jo naqsh-e-pā ke liye

zauq-e-nazzāra ne kiyā hai ḳhaak
surma huuñ chashm-e-surma-sā ke liye

justujū nañg-e-ārzū niklī
dard rusvā huā davā ke liye

baḌh chalī hai bahut hayā terī
mujh ko rusvā na kar ḳhudā ke liye

hai ḳhamoshī mujhe zabāñ 'vahshat'
fikr kyā arz-e-mudda.ā ke liye

'wahshat'-e-mubtala KHuda ke liye
jaan deta hai kyun wafa ke liye

aashna sab hue hain begane
ek begana-ashna ke liye

hum ne aalam se bewafai ki
ek mashuq-e-bewafa ke liye

tha use zauq-e-ashiq-azari
KHub main ne maze jafa ke liye

ghaalib aai faramushi us ki
wada taDpa kiya wafa ke liye

ye bhi teri gada-nawazi thi
main ne bose jo naqsh-e-pa ke liye

zauq-e-nazzara ne kiya hai KHak
surma hun chashm-e-surma-sa ke liye

justuju nang-e-arzu nikli
dard ruswa hua dawa ke liye

baDh chali hai bahut haya teri
mujh ko ruswa na kar KHuda ke liye

hai KHamoshi mujhe zaban 'wahshat'
fikr kya arz-e-muddaa ke liye


Source: Vahshat Hi Sahi

Leave a comment

+