kaisī kaisī thiiñ unhī galiyoñ meñ zebā sūrateñ
yaad ik ik moḌ pe aatī haiñ kyā kyā sūrateñ

nīm-shab hote haiñ vā jis dam darīche yaad ke
kis adā se jhāñktī haiñ ab vo rā.anā sūrateñ

sūrateñ kuchh dekh kar aisā bhī aatā thā ḳhayāl
ḳhaak se aisī kahāñ hotī haiñ paidā sūrateñ

luuT kar pahle-pahal aa.e the jab us shahr se
ajnabī lagtī thiiñ āñkhoñ ko shanāsā sūrateñ

aaj tak vo dil kī dīvāroñ pe kanda haiñ 'bashīr'
phir nazar aa.eñ nahīñ jo māh-sīmā sūrateñ

kaisi kaisi thin unhi galiyon mein zeba suraten
yaad ek ek moD pe aati hain kya kya suraten

nim-shab hote hain wa jis dam dariche yaad ke
kis ada se jhankti hain ab wo raana suraten

suraten kuchh dekh kar aisa bhi aata tha KHayal
KHak se aisi kahan hoti hain paida suraten

luT kar pahle-pahal aae the jab us shahr se
ajnabi lagti thin aankhon ko shanasa suraten

aaj tak wo dil ki diwaron pe kanda hain 'bashir'
phir nazar aaen nahin jo mah-sima suraten

Source: Rooh-e-Ghazal,Pachas Sala Intekhab