mujhe rif.atoñ kā ḳhumār thā so nahīñ rahā
tire dostoñ meñ shumār thā so nahīñ rahā

jise ab samajhte ho baar dīda-o-jān pe
kabhī rāh-e-manzil-e-yār thā so nahīñ rahā

tirī yaad bhī terī yaad thī so chalī ga.ī
tirā ġham hī merā qarār thā so nahīñ rahā

rah-e-dostī ke musāfiro zarā dekh kar
isī rah kā maiñ bhī savār thā so nahīñ rahā

vo jo pūchhte haiñ 'na.īm' kā use kyā huā
unheñ kah do un pe nisār thā so nahīñ rahā

mujhe rifaton ka KHumar tha so nahin raha
tere doston mein shumar tha so nahin raha

jise ab samajhte ho bar dida-o-jaan pe
kabhi rah-e-manzil-e-yar tha so nahin raha

teri yaad bhi teri yaad thi so chali gai
tera gham hi mera qarar tha so nahin raha

rah-e-dosti ke musafiro zara dekh kar
isi rah ka main bhi sawar tha so nahin raha

wo jo puchhte hain 'naim' ka use kya hua
unhen kah do un pe nisar tha so nahin raha