jo nāravā thā us ko ravā karne aayā huuñ
maiñ qarz dūsroñ kā adā karne aayā huuñ

ik tāza-tar futūr mire sar meñ aur hai
jo kar chukā huuñ us se sivā karne aayā huuñ

ḳhud ik savāl hai mirā aanā hī is taraf
ab kyā batāiye ki maiñ kyā karne aayā huuñ

kahnī hai dūsroñ se alag maiñ ne koī baat
maiñ kaam koī sab se judā karne aayā huuñ

ik daaġh hai ki jis kā lagānā hai ab surāġh
ik zaḳhm hai ki jis ko harā karne aayā huuñ

anjām-e-kār dil kā ye darvāza toḌ kar
maiñ saare qaidiyoñ ko rihā karne aayā huuñ

rakhtā huuñ apnā aap bahut khīñch-tān kar
chhoTā huuñ aur ḳhud ko baḌā karne aayā huuñ

jo kar rahe haiñ aise hī karte raheñge sab
maiñ to fuzūl chūn-o-charā karne aayā huuñ

ḳhairāt kā mujhe koī lālach nahīñ 'zafar'
maiñ is galī meñ sirf sadā karne aayā huuñ

jo narawa tha us ko rawa karne aaya hun
main qarz dusron ka ada karne aaya hun

ek taza-tar futur mere sar mein aur hai
jo kar chuka hun us se siwa karne aaya hun

KHud ek sawal hai mera aana hi is taraf
ab kya bataiye ki main kya karne aaya hun

kahni hai dusron se alag main ne koi baat
main kaam koi sab se juda karne aaya hun

ek dagh hai ki jis ka lagana hai ab suragh
ek zaKHm hai ki jis ko hara karne aaya hun

anjam-e-kar dil ka ye darwaza toD kar
main sare qaidiyon ko riha karne aaya hun

rakhta hun apna aap bahut khinch-tan kar
chhoTa hun aur KHud ko baDa karne aaya hun

jo kar rahe hain aise hi karte rahenge sab
main to fuzul chun-o-chara karne aaya hun

KHairaat ka mujhe koi lalach nahin 'zafar'
main is gali mein sirf sada karne aaya hun

Videos
This video is playing from YouTube Videos
This video is playing from YouTube Zafar Iqbal

Source: Book : Aaina-e-Dil (Pg. 21) Author : Dil Ayubi Publication : Nazish Book Center Lahore (1995) Edition : 1995