fart-e-alam se aah kiye jā rahā huuñ maiñ
ai ishq kyā gunāh kiye jā rahā huuñ maiñ

maqbūl hoñge dahr meñ dāġh-e-jigar mire
un ko charāġh-e-rāh kiye jā rahā huuñ maiñ

rañj o alam kā lutf uThāne ke vāste
rāhat se bhī nibāh kiye jā rahā huuñ maiñ

gulzār-e-kām-rānī o duniyā-e-ārzū
āmāl se tabāh kiye jā rahā huuñ maiñ

mujh ko atā huā thā dil-e-ā.inā-jamāl
sad haif use siyāh kiye jā rahā huuñ maiñ

ġham kah rahā hai kaun hai mujhe se sivā aziiz
sab ke diloñ meñ raah kiye jā rahā huuñ maiñ

fart-e-alam se aah kiye ja raha hun main
ai ishq kya gunah kiye ja raha hun main

maqbul honge dahr mein dagh-e-jigar mere
un ko charagh-e-rah kiye ja raha hun main

ranj o alam ka lutf uThane ke waste
rahat se bhi nibah kiye ja raha hun main

gulzar-e-kaam-rani o duniya-e-arzu
aamal se tabah kiye ja raha hun main

mujh ko ata hua tha dil-e-aina-jamal
sad haif use siyah kiye ja raha hun main

gham kah raha hai kaun hai mujhe se siwa aziz
sab ke dilon mein rah kiye ja raha hun main

Source: Book : naquush (Pg. 253)