Subscribe to our newsletter and get our newest updates

Aasi Ramnagri

  • Ghazal


ajib shahr ka naqsha dikhai deta hai


ajiib shahr kā naqshā dikhā.ī detā hai
jidhar bhī dekho añdherā dikhā.ī detā hai

nazar nazar kī hai aur apne apne zarf kī baat
mujhe to qatre meñ dariyā dikhā.ī detā hai

burā kahe jise duniyā burā nahīñ hotā
mirī nazar meñ vo achchhā dikhā.ī detā hai

nahīñ fareb-e-nazar ye yahī haqīqat hai
mujhe to shahr bhī sahrā dikhā.ī detā hai

haiñ sirf kahne ko bijlī ke qumqume raushan
har ek samt añdherā dikhā.ī detā hai

ajiib haal hai sailāb ban ga.e sahrā
jise bhī dekhiye pyāsā dikhā.ī detā hai

ajib shahr ka naqsha dikhai deta hai
jidhar bhi dekho andhera dikhai deta hai

nazar nazar ki hai aur apne apne zarf ki baat
mujhe to qatre mein dariya dikhai deta hai

bura kahe jise duniya bura nahin hota
meri nazar mein wo achchha dikhai deta hai

nahin fareb-e-nazar ye yahi haqiqat hai
mujhe to shahr bhi sahra dikhai deta hai

hain sirf kahne ko bijli ke qumqume raushan
har ek samt andhera dikhai deta hai

ajib haal hai sailab ban gae sahra
jise bhi dekhiye pyasa dikhai deta hai


Source: Book : Noquush (Pg. B-298 E-314) Publication : Nuqoosh Press Lahore (May June 1954) Edition : May June 1954

Leave a comment

+