Subscribe to our newsletter and get our newest updates

Prem Kumar Nazar

  • Ghazal


hai iKHtiyar mein tere na mere bas mein hai


hai iḳhtiyār meñ tere na mere bas meñ hai
vo ek lamha jo auroñ kī dastaras meñ hai

vo muñh se kuchh nahīñ kahtā ki pesh-o-pas meñ hai
badan kā karb to zāhir nafas nafas meñ hai

agarche shor bahut kūcha-e-havas meñ hai
vo kyā kare ki jo chālīsveñ baras meñ hai

karegā kaun use sāzish-e-badan meñ sharīk
jo shaḳhs qaid abhī ruuh ke qafas meñ hai

uTho ki phir hameñ izn-e-safar mile na mile
abhī to lutf-e-sadā nāla-e-jaras meñ hai

use pasand ki vo TuuT kar girā varna
shajar meñ kyā nahīñ hotā jo ḳhār-o-ḳhas meñ hai

hai iKHtiyar mein tere na mere bas mein hai
wo ek lamha jo auron ki dastaras mein hai

wo munh se kuchh nahin kahta ki pesh-o-pas mein hai
badan ka karb to zahir nafas nafas mein hai

agarche shor bahut kucha-e-hawas mein hai
wo kya kare ki jo chaaliswen baras mein hai

karega kaun use sazish-e-badan mein sharik
jo shaKHs qaid abhi ruh ke qafas mein hai

uTho ki phir hamein izn-e-safar mile na mile
abhi to lutf-e-sada nala-e-jaras mein hai

use pasand ki wo TuT kar gira warna
shajar mein kya nahin hota jo KHar-o-KHas mein hai


Source: Deewan-e-Daud Aurangabadi

Leave a comment

+