Subscribe to our newsletter and get our newest updates

Hameed Jalandhari

  • Ghazal


kal sham lab-e-baam jo wo jalwa-numa tha


kal shaam lab-e-bām jo vo jalva-numā thā
kis shauq se maiñ duur khaḌā dekh rahā thā

jab dost bhī dushman kā taraf-dār huā thā
Thankā thā usī din sar-e-mahfil mirā māthā

gūñjā huā ik naġhma sar-e-arz-o-samā thā
naġhma thā ki biitī huī sadiyoñ kī sadā thā

bhūlī nahīñ ujḌe hue gulshan kī bahāreñ
haañ yaad haiñ vo din ki hamārā bhī ḳhudā thā

har barg se aatī thī gul-o-lāla kī ḳhushbū
har mauj-e-havā meñ nafas-e-yār ghulā thā

tāsīr-ba-daman thiiñ javānī kī duā.eñ
har aah asar-ḳhez thī har naala rasā thā

jhapkī thī zarā aañkh ki barham huī mahfil
ham ne abhī kuchh un se kahā thā na sunā thā

jis baat kā iz.hār thā iz.hār-e-haqīqat
dekhā to usī baat pe hañgāma bapā thā

vo darpai-e-āzār haiñ ahbāb muḳhālif
ye din bhī ġharīboñ ke muqaddar meñ likhā thā

kyā dekh liyā aaj ki jī soch rahā hai
ye vāqi.a yūñhī kabhī pahle bhī huā thā

ham bazm se jā.eñge to ahbāb kaheñge
ik shā.ir-e-āvāra yahāñ naġhma-sarā thā

begāna-vashī kam na huī aap kī us se
har chand 'hamīd' aap kā pāband-e-vafā thā

kal sham lab-e-baam jo wo jalwa-numa tha
kis shauq se main dur khaDa dekh raha tha

jab dost bhi dushman ka taraf-dar hua tha
Thanka tha usi din sar-e-mahfil mera matha

gunja hua ek naghma sar-e-arz-o-sama tha
naghma tha ki biti hui sadiyon ki sada tha

bhuli nahin ujDe hue gulshan ki bahaaren
han yaad hain wo din ki hamara bhi KHuda tha

har barg se aati thi gul-o-lala ki KHushbu
har mauj-e-hawa mein nafas-e-yar ghula tha

tasir-ba-daman thin jawani ki duaen
har aah asar-KHez thi har nala rasa tha

jhapki thi zara aankh ki barham hui mahfil
hum ne abhi kuchh un se kaha tha na suna tha

jis baat ka izhaar tha izhaar-e-haqiqat
dekha to usi baat pe hangama bapa tha

wo darpai-e-azar hain ahbab muKHalif
ye din bhi gharibon ke muqaddar mein likha tha

kya dekh liya aaj ki ji soch raha hai
ye waqia yunhi kabhi pahle bhi hua tha

hum bazm se jaenge to ahbab kahenge
ek shair-e-awara yahan naghma-sara tha

begana-washi kam na hui aap ki us se
har chand 'hamid' aap ka paband-e-wafa tha


Leave a comment

+