Subscribe to our newsletter and get our newest updates

Jagan Nath Azad

  • Ghazal


koi izhaar-e-gham-e-dil ka bahana bhi nahin


koī iz.hār-e-ġham-e-dil kā bahāna bhī nahīñ
ho bahāna bhī jo koī to zamāna bhī nahīñ

zindagī tujh ko jo samjhā huuñ to itnā hī faqat
tū haqīqat bhī nahīñ aur fasāna bhī nahīñ

ḳhāmushī fikr kā mamba.a bhī hai aur baat ye hai
sāf-goī kā azīzo ye zamāna bhī nahīñ

ik ḳhazāna thā mirā 'josh'-malīh-ābādī
ab to 'āzād' vo hāthoñ meñ ḳhazāna bhī nahīñ

aaj ke daur meñ 'āzād' ġhanīmat hai bahut
tum use yaad na rakhnā to bhulānā bhī nahīñ

koi izhaar-e-gham-e-dil ka bahana bhi nahin
ho bahana bhi jo koi to zamana bhi nahin

zindagi tujh ko jo samjha hun to itna hi faqat
tu haqiqat bhi nahin aur fasana bhi nahin

KHamushi fikr ka mamba bhi hai aur baat ye hai
saf-goi ka azizo ye zamana bhi nahin

ek KHazana tha mera 'josh'-malih-abaadi
ab to 'azad' wo hathon mein KHazana bhi nahin

aaj ke daur mein 'azad' ghanimat hai bahut
tum use yaad na rakhna to bhulana bhi nahin


Leave a comment

+