Subscribe to our newsletter and get our newest updates

Ghulam Husain Sajid

  • Ghazal


dayar-e-KHwab ko niklunga sar uTha kar main


dayār-e-ḳhvāb ko niklūñgā sar uThā kar maiñ
ki shaad rahtā huuñ ranj-e-safar uThā kar maiñ

charāġh jal na sakegā jo us kī āñkhoñ meñ
dharūñgā us ko kisī taaq par uThā kar maiñ

sunā hai taḳht muqaddar se haath aatā hai
ḳhajil huuñ rāhat-e-teġh-o-sipar uThā kar maiñ

chale jo sarv-o-saman meñ bhī saath chal dūñgā
khaḌā rahūñgā na bār-e-samar uThā kar maiñ

tire bahisht meñ dil lag nahīñ rahā merā
ki saath lā nahīñ paayā huuñ ghar uThā kar maiñ

ulajh rahā ho agar ġhair kī nigāhoñ se
lapeT letā huuñ tār-e-nazar uThā kar maiñ

alag nahīñ huuñ maiñ apnī tarah ke logoñ se
paḌā huuñ zahmat-e-dīvār-o-dar uThā kar maiñ

nahīñ sunūñgā nasīhat kisī siyāne kī
rahūñgā tohmat-e-nau-e-bashar uThā kar maiñ

yaqīn kaise nahīñ aa.egā unheñ mujh par
vafā meñ fard huuñ ḳhauf-o-ḳhatar uThā kar maiñ

kahīñ visāl kī sūrat agar dikhā.ī dī
nikal paḌūñgā na sham-e-sahar uThā kar maiñ

kisī parī ke tasavvur meñ chuum letā huuñ
kisī gulāb ko bār-e-digar uThā kar maiñ

bahut haiñ chāhne vaale mire jahāñ-bhar meñ
girafta dil nahīñ bār-e-hunar uThā kar maiñ

makān chhoḌ to duuñ us hasīñ ke kahne par
galī meñ lā.ūñgā kyā kyā magar uThā kar maiñ

mujhe vo taish dilāte rahe agar 'sājid'
to gūñdh dūñgā ye saarā nagar uThā kar maiñ

dayar-e-KHwab ko niklunga sar uTha kar main
ki shad rahta hun ranj-e-safar uTha kar main

charagh jal na sakega jo us ki aankhon mein
dharunga us ko kisi taq par uTha kar main

suna hai taKHt muqaddar se hath aata hai
KHajil hun rahat-e-tegh-o-sipar uTha kar main

chale jo sarw-o-saman mein bhi sath chal dunga
khaDa rahunga na bar-e-samar uTha kar main

tere bahisht mein dil lag nahin raha mera
ki sath la nahin paya hun ghar uTha kar main

ulajh raha ho agar ghair ki nigahon se
lapeT leta hun tar-e-nazar uTha kar main

alag nahin hun main apni tarah ke logon se
paDa hun zahmat-e-diwar-o-dar uTha kar main

nahin sununga nasihat kisi siyane ki
rahunga tohmat-e-nau-e-bashar uTha kar main

yaqin kaise nahin aaega unhen mujh par
wafa mein fard hun KHauf-o-KHatar uTha kar main

kahin visal ki surat agar dikhai di
nikal paDunga na sham-e-sahar uTha kar main

kisi pari ke tasawwur mein chum leta hun
kisi gulab ko bar-e-digar uTha kar main

bahut hain chahne wale mere jahan-bhar mein
girafta dil nahin bar-e-hunar uTha kar main

makan chhoD to dun us hasin ke kahne par
gali mein launga kya kya magar uTha kar main

mujhe wo taish dilate rahe agar 'sajid'
to gundh dunga ye sara nagar uTha kar main


Leave a comment

+