thakan ġhālib hai dam TuuTe hue haiñ
safar jaarī qadam TuuTe hue haiñ

ba-zāhir to haiñ sālim jism-o-jāñ se
magar andar se ham TuuTe hue haiñ

adhūre haiñ yahāñ saare ke saare
sabhī to besh-o-kam TuuTe hue haiñ

burā ho e'timād-e-bāhamī kā
ki sab qaul-o-qasam TuuTe hue haiñ

ta.alluq TūTne ko hai jahāñ se
chalo ki band-e-ġham TuuTe hue haiñ

ḳhudā kā ghar na baḳhshā zālimoñ ne
ka.ī dair-o-haram TuuTe hue haiñ

unheñ munsif nahīñ qātil kaho tum
ki sab un ke qalam TuuTe hue haiñ

thakan ghaalib hai dam TuTe hue hain
safar jari qadam TuTe hue hain

ba-zahir to hain salim jism-o-jaan se
magar andar se hum TuTe hue hain

adhure hain yahan sare ke sare
sabhi to besh-o-kam TuTe hue hain

bura ho e'timad-e-bahami ka
ki sab qaul-o-qasam TuTe hue hain

talluq TuTne ko hai jahan se
chalo ki band-e-gham TuTe hue hain

KHuda ka ghar na baKHsha zalimon ne
kai dair-o-haram TuTe hue hain

unhen munsif nahin qatil kaho tum
ki sab un ke qalam TuTe hue hain

Source: Book : Aazadi ke baad dehli men urdu gazal (Pg. 297) Author : Professor Unwan Chishti Publication : Asila Offset Printers, Kalan Mahal, Dariyaganj, New Delhi-6 (1989) Edition : 1989