Subscribe to our newsletter and get our newest updates

Jagan Nath Azad

  • Ghazal


ab main hun aap ek tamasha bana hua


ab maiñ huuñ aap ek tamāshā banā huā
guzrā ye kaun merī taraf dekhtā huā

kaif-e-ġham-e-firāq kī lazzat jise milī
hāsil use visāl nahīñ hai to kyā huā

ḳhāshāk-e-zindagī to milā us ke saath saath
terā karam ki dard kā sho.ala atā huā

dar tak tire ḳhudī ne na aane diyā jise
āñkhoñ se ashk ban ke vo sajda adā huā

shīrīni-e-hayāt kī lazzat meñ hai kamī
kuchh is meñ zahr-e-ġham na agar ho milā huā

kuchh kam nahīñ hoñ lazzat-e-furqat se faiz-yāb
hāsil agar visāl nahīñ hai to kyā huā

ab is maqām par hai mirī zindagī ki hai
har dost ek nāseh-e-mushfiq banā huā

ye bhī zarā ḳhayāl rahe āzim-e-haram
raste meñ but-kade kā bhī dar hai khulā huā

vo qadd-e-nāz aur vo chehre kā husn o rañg
jaise ho phuul shāḳh pe koī khilā huā

pesh-e-nazar thī manzil-e-jānāñ kī justujū
aur phir rahā huuñ apnā pata DhūñDtā huā

kah kar tamām raat ġhazal sub.h ke qarīb
'āzād' misl-e-sham-e-sahar huuñ bujhā huā

ab main hun aap ek tamasha bana hua
guzra ye kaun meri taraf dekhta hua

kaif-e-gham-e-firaq ki lazzat jise mili
hasil use visal nahin hai to kya hua

KHashak-e-zindagi to mila us ke sath sath
tera karam ki dard ka shoala ata hua

dar tak tere KHudi ne na aane diya jise
aankhon se ashk ban ke wo sajda ada hua

shirini-e-hayat ki lazzat mein hai kami
kuchh is mein zahr-e-gham na agar ho mila hua

kuchh kam nahin hon lazzat-e-furqat se faiz-yab
hasil agar visal nahin hai to kya hua

ab is maqam par hai meri zindagi ki hai
har dost ek naseh-e-mushfiq bana hua

ye bhi zara KHayal rahe aazim-e-haram
raste mein but-kade ka bhi dar hai khula hua

wo qadd-e-naz aur wo chehre ka husn o rang
jaise ho phul shaKH pe koi khila hua

pesh-e-nazar thi manzil-e-jaanan ki justuju
aur phir raha hun apna pata DhunDta hua

kah kar tamam raat ghazal subh ke qarib
'azad' misl-e-sham-e-sahar hun bujha hua


Source: Book : Pathan Shayraat ka Tazkira (Pg. 104) Author : Khan Mohammad Atif Publication : Khan Mohammad Atif (1983) Edition : 1983

Leave a comment

+