maanā ki ham is daur kā hāsil to nahīñ the
nā-qadrī-e-duniyā ke bhī qābil to nahīñ the

aatā to sahī bād-e-sahar kā koī jhoñkā
ham ḳhaas kisī phuul pe maa.il to nahīñ the

har shaḳhs ne naqsh-e-kaf-e-pā ham ko banāyā
har shaḳhs kī ham raah meñ haa.il to nahīñ the

do ghūñT hī pī lete agar koī pilātā
ham rind-e-ḳhush-auqāt the saa.il to nahīñ the

kyā baat hai 'nūrī' jo hai ab lahje meñ narmī
tum narmī-e-guftār ke qātil to nahīñ the

mana ki hum is daur ka hasil to nahin the
na-qadri-e-duniya ke bhi qabil to nahin the

aata to sahi baad-e-sahar ka koi jhonka
hum KHas kisi phul pe mail to nahin the

har shaKHs ne naqsh-e-kaf-e-pa hum ko banaya
har shaKHs ki hum rah mein hail to nahin the

do ghunT hi pi lete agar koi pilata
hum rind-e-KHush-auqat the sail to nahin the

kya baat hai 'nuri' jo hai ab lahje mein narmi
tum narmi-e-guftar ke qatil to nahin the

Source: Book : Nuskha Hai Wafa (Pg. 293 (369))