Subscribe to our newsletter and get our newest updates

Bahadur Shah Zafar

  • Ghazal


waqif hain hum ki hazrat-e-gham aise shaKHs hain


vāqif haiñ ham ki hazrat-e-ġham aise shaḳhs haiñ
aur phir ham un ke yaar haiñ ham aise shaḳhs haiñ

dīvāne tere dasht meñ rakkheñge jab qadam
majnūñ bhī legā un ke qadam aise shaḳhs haiñ

jin pe hoñ aise zulm o sitam ham nahīñ vo log
hoñ roz balki lutf o karam aise shaḳhs haiñ

yuuñ to bahut haiñ aur bhī ḳhūbān-e-dil-fareb
par jaise pur-fan aap haiñ kam aise shaḳhs haiñ

kyā kyā jafā-kashoñ pe haiñ un dilbaroñ ke zulm
aisoñ ke sahte aise sitam aise shaḳhs haiñ

diiñ kyā hai balki dījiye īmān bhī unheñ
zāhid ye but ḳhudā kī qasam aise shaḳhs haiñ

āzurda huuñ adū ke jo kahne pe ai 'zafar'
ne aise shaḳhs vo haiñ na ham aise shaḳhs haiñ

waqif hain hum ki hazrat-e-gham aise shaKHs hain
aur phir hum un ke yar hain hum aise shaKHs hain

diwane tere dasht mein rakkhenge jab qadam
majnun bhi lega un ke qadam aise shaKHs hain

jin pe hon aise zulm o sitam hum nahin wo log
hon roz balki lutf o karam aise shaKHs hain

yun to bahut hain aur bhi KHuban-e-dil-fareb
par jaise pur-fan aap hain kam aise shaKHs hain

kya kya jafa-kashon pe hain un dilbaron ke zulm
aison ke sahte aise sitam aise shaKHs hain

din kya hai balki dijiye iman bhi unhen
zahid ye but KHuda ki qasam aise shaKHs hain

aazurda hun adu ke jo kahne pe ai 'zafar'
ne aise shaKHs wo hain na hum aise shaKHs hain


Leave a comment

+