tum ne hamārā saath diyā to ḳhud ko ham pā jā.eñge
varna apnī zaat se hamdam phir dhokā khā jā.eñge

kaḌī dhuup meñ ham le aa.e apne komal gītoñ ko
un ke phuul se chehre dekheñ dhuup meñ kumhlā jā.eñge

āñkheñ muuñd ke chalne vaale dhun ke pakke nikle to
chalte chalte ik din āḳhir manzil ko pā jā.eñge

kaun havāoñ ke par bāñdhe kaun hamārā rasta roke
aag kā dariyā hogā to bhī tair ke ham aa jā.eñge

dānā.ī ke shahr ke baasī pāgal-pan ke jañgal meñ
jañgal vaalo aañkh bachā kar aag sī bhaḌkā jā.eñge

man kī aañkh khule to samjho nuur kā ziina chaḌhnā hai
varna tan kī aañkh ke shīshe dhuup meñ dhuñdlā jā.eñge

dard-havā kā pīchhā karnā sab ke bas kī baat nahīñ
apnā pīchhā karte karte dost bhī uktā jā.eñge

tum ne hamara sath diya to KHud ko hum pa jaenge
warna apni zat se hamdam phir dhoka kha jaenge

kaDi dhup mein hum le aae apne komal giton ko
un ke phul se chehre dekhen dhup mein kumhla jaenge

aankhen mund ke chalne wale dhun ke pakke nikle to
chalte chalte ek din aaKHir manzil ko pa jaenge

kaun hawaon ke par bandhe kaun hamara rasta roke
aag ka dariya hoga to bhi tair ke hum aa jaenge

danai ke shahr ke basi pagal-pan ke jangal mein
jangal walo aankh bacha kar aag si bhaDka jaenge

man ki aankh khule to samjho nur ka zina chaDhna hai
warna tan ki aankh ke shishe dhup mein dhundla jaenge

dard-hawa ka pichha karna sab ke bas ki baat nahin
apna pichha karte karte dost bhi ukta jaenge